ប្រេស៊ីល៖ លោក Mario Zagallo (ម៉ារីអូ ហ្សាហ្កាឡូ) ដែលធ្លាប់ជួយឱ្យប្រេស៊ីលគ្រងជើងឯកបាល់ទាត់ពិភពលោក ៤លើក ទាំងក្នុងអាជីពជាកីឡាករ និងជាគ្រូបង្វឹក បានទទួលមរណភាពហើយនៅព្រឹកថ្ងៃសៅរ៍នេះ ក្នុងវ័យ ៩២ឆ្នាំ។ នេះបើតាមការបញ្ជាក់នៅលើបណ្ដាញសង្គម Instagram របស់លោកផ្ទាល់។
ក្នុងនាមជាអតីតកីឡាករស្លាបឆ្វេងពោរពេញដោយជំនាញ និងទេពកោសល្យបាល់ទាត់ លោក Zagallo គឺជាកីឡាករដែលរួមចំណែកឱ្យប្រេស៊ីលឈ្នះពាន World Cup ជាលើកដំបូងបង្អស់នៅឆ្នាំ១៩៥៨ និងបន្តជាប់ជម្រើសជាតិជាបន្តបន្ទាប់ ព្រមទាំងរួមចំណែកជួយឱ្យប្រេស៊ីលការពារជើងឯក World Cup បានសម្រេចនៅឆ្នាំ១៩៦២។
ក្នុងឆ្នាំ ១៩៧០ លោកបានទទួលដំណែងជាគ្រូបង្វឹកក្រុមជម្រើសជាតិប្រេស៊ីល ក្នុងរជ្ជកាលមាសដែលពោរពេញទៅដោយកីឡាករល្អៗជាច្រើនរូមមាន Pele, Jairzinho, Rivellino និង Tostao ជាដើម ដែលជាក្រុមគេចាត់ទុកថាល្អបំផុតក្នុងប្រវត្តិសាស្រ្ត World Cup ដែលបានជួយឱ្យប្រេស៊ីលឈ្នះពានពិភពលោកលើកទី៣ នៅលើទឹកដីម៉ិកស៊ិកតែម្តង។ ជ័យជម្នះនេះបានធ្វើឱ្យលោកក្លាយជាបុគ្គលដំបូងគេបង្អស់ដែលអាចឈ្នះជើងឯកពិភពលោកទាំងក្នុងអាជីពជាកីឡាករ និងគ្រូបង្វឹក។ ក្រោយមក លោកក៏បានទទួលដំណែងជាជំនួយការគ្រូបង្វឹកប្រេស៊ីល លោក Carlos Alberto Parreira គ្រាដែលប្រេស៊ីលឈ្នះជើងឯកពិភពលោកលើកទី៤ ក្នុងឆ្នាំ១៩៩៤ លើទឹកដីសហរដ្ឋអាមេរិក។
អ្នកគាំទ្រប្រេស៊ីលស្រឡាញ់លោក Zagallo ជាខ្លាំងលើចំណុចប្លែកដែលទ្រគោះបោះបោក និងសម្តីបែបឈ្លើយរបស់លោក ប៉ុន្តែលោកគឺជាបុគ្គលដែលអ្នកគាំទ្រដឹងថាពោរពេញទៅដោយស្មារតីជាតិនិយម។ លោកតែងតែនិយាយថា លោកកើតមកដើម្បីទទួលបានជ័យជម្នះ និងចូលចិត្តផ្ចាញ់ទៅលើអ្នកដែលនិយាយថាក្រុមរបស់លោកភាគច្រើនគឺលេងដោយការពារច្រើន។ លោក Zagallo ក៏ត្រូវបានគេស្គាល់ថាជាមនុស្សមានអបិយជំនឿខ្ពស់ ហើយជឿថាលេខ ១៣ គឺជាលេខនាំសំណាងដល់លោក។ លោកបានរៀបការជាមួយភរិយារបស់លោកនៅថ្ងៃ១៣ ហើយមានម្តងនោះគឺបាននិយាយលេងថា លោកនឹងចូលនិវត្តន៍នៅម៉ោង ១៣ៈ០០ ថ្ងៃទី១៣ ខែកក្កដា ឆ្នាំ២០១៣។
ជានិច្ចកាល លោក Mario Zagallo តែងតែបង្ហាញភាពស្វាហាប់ និងពោរពេញដោយប្រជាប្រិយភាពជានិច្ច ហើយពុំដែលបានមុខពីទីសាធារណៈឡើយ។ ជារឿយៗ លោកតែងតែបង្ហាញខ្លួននៅលើកញ្ចក់ទូរទស្សន៍ ចូលរួមកម្មវិធីប្រគល់ពានរង្វាន់ផ្សេងៗ និងលេចមុខជួយដល់សហព័ន្ធបាល់ទាត់ប្រេស៊ីលផងដែរ។ លោកបានរៀបការនៅថ្ងៃទី១៣ ខែមករា ឆ្នាំ១៩៩៥ ជាមួយលោកស្រី Alcina de Castro ដោយមានកូនជាមួយគ្នាចំនួន ៤នាក់ និងបានបន្តរួមរស់ជាមួយគ្នារហូតដល់ភរិយារបស់លោកទទួលមរណភាពនៅឆ្នាំ២០១២៕
